"Soyadları açıqlamadan viza məhdudiyyətləri tətbiq edildikdə bunun tək bir təsiri ola bilər: digər dövlətə qarşı hörmətsizlik. Bu, tərəfdaşlıq ruhuna uyğun deyil".

Aktual.ge xəbər verir ki, bu fikirləri Gürcüstanın Baş naziri İrakli Kobaxidze ABŞ-ın 34-ə yaxın Gürcüstan hökumət nümayəndəsi və onların birinci dərəcəli ailə üzvlərinə qarşı viza sanksiyası tətbiq etməsinə münasibət bildirərkən səsləndirib.

Hökumət başçısının sözlərinə görə, bu günə qədər heç bir deputata viza məhdudiyyətlərinin tətbiqi barədə bildiriş verilməyib.

“Amerika Birləşmiş Ştatları məhz bu viza məhdudiyyətlərini tətbiq etdi. Onlar buna sanksiya adını vermirlər, bu viza məhdudiyyətləridir. Əslində, bu viza məhdudiyyətləri soyadların açıqlanmadan tətbiq edilib və biz daha da çox şey yoxladıq, bu günə qədər heç bir deputata viza məhdudiyyətlərinin tətbiqi barədə bildiriş gəlməyib. Buna görə də, müxalifətdə yaranmış bu ajiotaj tamamilə şişirdilib. Açıqlandığı qərar isə Gürcüstan dövləti və cəmiyyəti üçün təhqiredicidir. Çünki tərəfdaş ölkə ilə belə danışmaq olmaz, amma bu qərarın praktiki əhəmiyyətinə gəldikdə, praktiki əhəmiyyət əslində sıfırdır. Soyadları açıqlanmadan viza məhdudiyyətləri tətbiq edildikdə bunun tək bir təsiri ola bilər: digər dövlətə qarşı hörmətsizlik. Bu, tərəfdaşlıq ruhuna uyğun deyil, amma gələcəkdə tərəfdaşlıq münasibətlərini gücləndirmək üçün hər şeyi etməliyik. Bu bizim arzumuzdur. Mən bir daha hazırkı səfirə olan hörmətimi ifadə etmək istəyirəm, onun fəaliyyəti əvvəlki səfirin fəaliyyətindən keyfiyyətcə fərqlidir.
Buna görə də, optimizm üçün əsasımız var və ümid edirəm ki, mövcud yanlış relslərdən bu münasibətlər doğru relslərə keçəcək. Vaxtilə əvvəlki səfir Gürcüstan-Amerika münasibətlərini o qədər korladı ki, bundan çoxunu korlamaq praktik olaraq nəzəri olaraq mümkün deyildi. Əvvəlki səfir Gürcüstan-Amerika münasibətlərini maksimum dərəcədə korladı. Bunun heç bir praktiki əhəmiyyəti yoxdur. Xatırlayırsınızsa, vaxtilə hakimlərə qarşı da belə viza məhdudiyyətləri tətbiq olunmuşdu, amma bu, heç bir şəkildə məhkəmənin fəaliyyətinə təsir etmədi. Məhkəmənin müstəqilliyini məhdudlaşdırmadı. Amerika reputasiyasına təsir etdi. Fakt və sübut olmadan viza məhdudiyyətləri tətbiq etdikdə bu, təbii ki, ölkənin reputasiyasına təsir edir" , - deyə İrakli Kobaxidze qeyd edib.