Ağ Evin administrasiyasının siyasi məsələlər üzrə rəhbər müavini və milli təhlükəsizlik üzrə müşaviri Stiven Miller Fox News kanalına müsahibəsində Somalidə baş verdiyi iddia edilən və onun sözlərinə görə, ABŞ tarixində ən böyük fırıldaqçılıq qalmaqallarından biri ola biləcək hadisəni şərh edib.

Aktual.ge xəbər verir ki, Miller bildirib ki, Prezident Donald Tramp “qaçqın imperiyası” adlandırdığı sistemin əsl mahiyyətini üzə çıxarıb.

Onun sözlərinə görə, Co Bayden administrasiyası dövründə qaçqınların ABŞ-a gətirilməsi, onlara vətəndaşlıq əldə olunmasında yardım göstərilməsi və bütün sosial yardım proqramlarına cəlb olunması ilə məşğul olan qeyri-hökumət təşkilatları milyardlarla dollar məbləğində maliyyələşdirilib.

Trampın müşaviri bu təşkilatların topladığı böyük sərvəti və fəaliyyətlərini “dəhşətli və biabırçı” adlandırıb.

“Prezident Tramp qaçqınların guya ‘sənaye kompleksi’ adlandırılan sisteminin arxasındakı həqiqəti üzə çıxardı. Tarixən ABŞ hökuməti Bayden dövründə bu məsələni ifrata çatdırdı və üçüncü sektor qruplarına qrantlar vasitəsilə milyardlarla dollar payladı. Qeyri-hökumət təşkilatları Dövlət Departamenti ilə əməkdaşlıq edərək dünyanın ən disfunksional bölgələrindən ən yoxsul insanları tapır və onları Amerikanın kiçik şəhərlərinə köçürürlər. Adətən kənd tipli icmaları tam transformasiya etmək üçün seçirlər. Onlar Ohayo və Men ştatlarının kiçik şəhərlərində, eləcə də Minnesotada – Minneapolislə Sent-Pol arasında həyata keçirilən mərkəzi layihələr çərçivəsində məskunlaşırlar. Bu qeyri-kommersiya təşkilatları ölçüyəgəlməz dərəcədə varlanır, böyük sərvətlər toplayır və dünyanın indiyə qədər gördüyü ən zəngin qeyri-kommersiya qurumlarına çevrilirlər. Onların işi qaçqınları ABŞ-a gətirmək, vətəndaşlıq əldə etmələrinə yardım göstərmək və bütün sosial yardım proqramlarına qoşulmalarını təmin etməkdir. Bu, dəhşət və biabırçılıqdır. Prezident Tramp bütün qaçqınların yenidən yerləşdirilməsini dayandırıb”, – deyə Stiven Miller qeyd edib.