ABŞ prezidenti Donald Trumpın ailə şirkəti Gürcüstanın paytaxtında yerli tərəfdaşlarla birlikdə “Trump Tower” tikməyi planlaşdırır. 

Aktual.ge xəbər verir ki, "The Trump Organization"un rəsmi press-relizinə görə, 70 mərtəbəli premium sinif göydələn Mərkəzi Parkın (keçmiş hippodrom) yaxınlığında tikilməlidir.

Təşkilat hesab edir ki, “Trump Tower Tbilisi” bütün Gürcüstanda ən hündür bina olacaq.

Məlumata görə, dəbdəbəli göydələn dünyanın ən böyük memarlıq firmalarından biri olan "Gensler" tərəfindən layihələndiriləcək və bu, müxtəlif tipli məkanları birləşdirən çoxfunksiyalı, dinamik təyinatlı mərkəz olacaq.

“Mərkəzi Parkın yaxınlığında yerləşməsi sayəsində ‘Trump Tower Tbilisi’ çoxfunksiyalı və dinamik təyinatlı mərkəz olacaq. Burada lüks rezidensiyalar, premium sinif ticarət obyektləri, dünya səviyyəli restoranlar və yüksək həyat tərzi üçün lazım olan bütün şərait bir araya gələcək.

Ultra-dəbdəbəli həyat tərzi və memarlıq mükəmməlliyi standartları ilə tanınan Trump brendinin qlobal portfelinin bir hissəsi olaraq bu göydələn Tbilisinin beynəlxalq investisiyalar, mədəniyyət və Avropa ilə Asiyanın kəsişməsində yüksək səviyyəli həyat mərkəzinə çevrilməsində mühüm rol oynayacaq.

Bu, qlobal premium həyat üçün Tbilisinin yeni simvolu olacaq”, - deyə "The Trump Organization"un məlumatında bildirilir.

Təşkilat həmçinin qeyd edir ki, “Trump Tower Tbilisi” layihəsi Trump brendinin regionda ilk layihəsi olacaq və Tbilisinin mühüm biznes mərkəzi kimi formalaşmasını, həmçinin Şərqi Avropa ilə Asiya arasında beynəlxalq biznes üçün qapı rolunu vurğulayır. Eyni zamanda şəhərin premium daşınmaz əmlak üzrə qlobal alıcılar arasında artan populyarlığı qeyd olunur.

“Trump Tower Tbilisi”nin yerli tərəfdaşları kim olacaq?

"The Trump Organization"un icraçı vitse-prezidenti, Eric Trump bildirib ki, brend Gürcüstana qlobal reputasiyaya malik keyfiyyət təqdim etməkdən məmnundur.

“Trump adı dünyada ən lüks daşınmaz əmlak layihələri ilə əlaqələndirilir və Trump Tower Tbilisi bu irsin davamıdır. Bu qlobal səviyyədə tanınan mükəmməllik standartını Gürcüstana gətirdiyimiz üçün şadıq və xüsusilə bu layihədə belə hörmətli və peşəkar inkişaf etdiricilərlə əməkdaşlıq etməkdən məmnunuq” , - deyə Eric Trump qeyd edib.

Qeyd olunur ki, "Trump Organization" bu göydələni Gürcüstanda həm beynəlxalq, həm də yerli şirkətlərlə əməkdaşlıq çərçivəsində tikməyi planlaşdırır. Rəsmi məlumata görə, layihənin tərəfdaşları bunlardır: "Biograpi Living", "Archi Group", "The Sapir Organization", "Blox Group" və "Finvest Georgia".

Layihə ilə bağlı əlavə detallar, o cümlədən memarlıq, dizayn və satış barədə məlumatlar yaxın aylarda açıqlanacaq.

Qeyd edək ki, məlumatı beynəlxalq "The Wall Street Journal" nəşri və "Reuters" agentliyi yaydıqdan sonra Donald Trumpın rəsmi "Trump.com" saytında da yayımlanıb.