Gürcüstan hökuməti tərəfindən yeni yaradılmış "Mərkəzi Satınalma Orqanı" 47,3 milyon lari dəyərində 2026-cı il istehsalı olan 595 yeni avtomobil alır.

Aktual.ge xəbər verir ki, bu barədə məlumatı BPN tender sənədlərinə istinadən yayıb.

Xüsusilə, qurum nəqliyyat vasitələrinin alınması məqsədilə 5 tender elan edib və bununla müxtəlif dövlət qurumları üçün avtomobillər əldə etməyi planlaşdırır.

Tender sənədlərində qeyd olunduğu kimi, hökumət ixtisaslaşdırılmış avtomobillər (pikap), hibrid avtomobillər və yüksək keçid qabiliyyətli hibrid avtomobillər alır.

Qeyd edək ki, "Mərkəzi Satınalma Orqanı" nəqliyyat vasitələrini Milli Qida Agentliyi, Gəlirlər Xidməti, Milli Meşə Təsərrüfatı Agentliyi, Meliorasiya, Dövlət Mühafizə Xidməti və Maliyyə Nazirliyinin İstintaq Xidməti üçün almağı planlaşdırır.

Daha konkret desək, bir neçə hissədən ibarət elan edilmiş dövlət satınalmasına əsasən, hökumət aşağıdakıları alır:

• 27 milyon 571 min 695 lariyə 305 ədəd ixtisaslaşdırılmış (pikap) avtomobil;

• 7 milyon 947 min 800 lariyə III sinif yüngül, yüksək keçid qabiliyyətli 98 tam hibrid avtomobil;

• 9 milyon 218 min 040 lariyə III sinif yüngül 156 tam hibrid avtomobil;

• 2 milyon 319 min 900 lariyə II sinif yüngül 33 tam hibrid avtomobil;

• 270 min 576 lariyə II sinif 3 ədəd yüngül elektrik avtomobili.

Texniki tapşırıqlara əsasən, alınan avtomobillərin 2026-cı il istehsalı olması tələb olunur.

Tenderlər üçün təkliflərin qəbuluna iyunun 24-də başlanacaq və iyunun 25-də yekunlaşacaq.