Rusiyanın paytaxtı Moskva gecə saatlarında irimiqyaslı pilotsuz uçuş aparatı (PUA) hücumunun hədəfi olub.

Aktual.ge xəbər verir ki, təxminən 180 PUA-nın istifadə olunduğu hücumda Moskva Neft Emalı Zavodu vurulub, partlayışın şiddətindən bir binanın damı uçub. Paytaxtdakı dörd böyük hava limanında uçuşlar dayandırılıb.

Rusiya ilə Ukrayna arasında gərginlik artmaqda davam edərkən, müharibənin alovları bir daha Rusiyanın ürəyi Moskvaya sıçradı. Gecə saatlarında paytaxta qarşı həyata keçirilən intensiv PUA hücumu şəhərdə təşvişə və böyük miqyaslı dağıntılara səbəb olub

Hücumun miqyası ilə bağlı ilk rəsmi açıqlama Moskva meri Sergey Sobyanin tərəfindən verilib. Sosial şəbəkə hesabı vasitəsilə ictimaiyyəti məlumatlandıran Sobyanin, Rusiya hava hücumundan müdafiə sistemlərinin şəhərə yönələn intensiv PUA hücumunu dəf etmək üçün fasiləsiz çalışdığını bildirib.

Gecə saatlarında Moskvaya yönələn təxminən 180 PUA-nın məhv edildiyini qeyd edən Sobyanin, bəzi PUA-ların hava hücumundan müdafiə şəbəkəsini aşaraq Moskva Neft Emalı Zavoduna çatdığını təsdiqləyib.

Qeyd edək ki, Rusiyanın paytaxt bölgəsindəki ən vacib yanacaq istehsalı müəssisələri arasında yer alan Moskva Neft Emalı Zavodu qısa müddət əvvəl də oxşar hücumun hədəfi olmuşdu. Müəssisə iyunun 16-da təşkil edilən PUA hücumunda da zərər görmüş, zavod ərazisində çıxan yanğın briqadaların uzun sürən səyləri nəticəsində söndürülə bilmişdi.