“Bizim siyasi komandamız üçün hər kəsin hər şeyi bildiyi və dəstəyimizin xeyli böyük olduğu bir rəqibə sahib olmaq daha məqsədəuyğundur. Lakin biz iddianı siyasi məqsədəuyğunluqdan irəli gələrək deyil, Konstitusiyanın üzərimizə qoyduğu öhdəlik əsasında təqdim edirik”, – deyə Arçil Gorduladze bildirib.

Aktual.ge xəbər verir ki, bunu Gürcüstan parlamentinin Hüquq məsələləri komitəsinin sədri Arçil Gorduladze Konstitusiya Məhkəməsində keçirilən iclasda deyib.

O bildirib ki, Konstitusiya Məhkəməsinin plenumunun iclasında atılan hər bir addım hüquqi baxımdan qiymətləndirilir və hakim komandanın mövqeyinə görə, bu addımlar Konstitusiyanın pozulmasıdır. Onun fikrincə, bu məsələdə siyasi amil, yumşaq desək, ikinci dərəcəli olmalıdır.

Gorduladze qeyd edib ki, məsələyə dar partiya maraqları baxımından yanaşılsaydı, hakim komanda üçün siyasi arenada bütün fəaliyyəti cəmiyyətə məlum olan müxalifət partiyalarının rəqib olaraq qalması daha sərfəli olardı.

Onun sözlərinə görə, həmin partiyaların keçmişdə nə etdikləri, hazırda hansı fəaliyyətlə məşğul olduqları və gələcək məqsədləri ictimaiyyətə məlumdur.

Gorduladze bildirib ki, 2024-cü il parlament seçkilərində və 2025-ci il yerli özünüidarəetmə seçkilərində hakim komandaya göstərilən dəstək təxminən eyni olub və bir milyon 120 mindən çox səs təşkil edib.

Komitə sədri vurğulayıb ki, iddianın təqdim olunması siyasi məqsədəuyğunluqla deyil, Konstitusiyadan irəli gələn öhdəliklə bağlıdır. 

Gorduladzenin sözlərinə görə, məqsəd ölkədə hüquqi dövlətin və demokratiyanın fundamental prinsiplərini, eləcə də konstitusiya quruluşunu qorumaq və bu quruluşa təhlükə yaranmasının qarşısını almaqdır.