Kateqoriyalar
2026-cı ilin iyul ayından etibarən Gürcüstanda və onun hüdudlarından kənarda bir sıra dəyişikliklərin qüvvəyə minməsi planlaşdırılır.
Aktual.ge xəbər portalı bu gündən, yəni 1 iyuldan etibarən qüvvəyə minməsi nəzərdə tutulan yeniliklər barədə məlumatı təqdim edir.
Kənd İnkişafı Agentliyi 2026-cı il 1 iyul tarixdən "Dövlət Aqro-müştərək Maliyyələşdirmə Proqramı"nın icrasına başlayır. Atılan bu addım kənd təsərrüfatı sektorunun inkişafına dəstək məqsədi daşıyır.
Ətraf Mühitin Mühafizəsi və Kənd Təsərrüfatı Nazirliyinin məlumatına görə, aqrar sektorun inkişafını stimullaşdırmaq üçün hazırlanmış yeni proqram vahid dəstək mexanizmidir. Bura həm birincili istehsal, həm də kənd təsərrüfatı məhsullarının saxlanması və emalı istiqamətləri daxildir.
Xarici valyutada kreditlərin verilməsinə yeni məhdudiyyətlər tətbiq olunur. Gürcüstan Milli Bankının prezidentinin sərəncamına əsasən, bu dəyişiklik 2026-cı il iyulun 1-dən qüvvəyə minir.
Daha dəqiq desək, bu gündən etibarən kredit verən təşkilatlar 1 000 000 lariyə qədər olan bank kreditlərini yalnız milli valyutada – lari ilə verəcəklər.
Müvafiq olaraq, gəliri lari ilə olan vətəndaşlar artıq 1 milyon lariyə qədər olan kreditləri xarici valyutada götürə bilməyəcəklər.
Bu gündən etibarən Tbilisidə ev heyvanlarının saxlanması və onlara qulluq qaydalarının pozulmasına görə cərimələrin tətbiqinə başlanılır. Tbilisi Şəhər Məclisi (Sakrebulo) tərəfindən təsdiq edilmiş sənədə əsasən, pişik və itlərə 4 statusdan biri veriləcək: sahibli, sığınacaq verilmiş (məhəllə heyvanı), nəzarətsiz və sahibsiz.
Heyvan sahibinə, bir kadastr kodu ilə qeydiyyata alınmış sahədə 5-dən çox heyvan (yaşı 6 ayı keçməyən küçüklər/pişik balaları istisna olmaqla) saxlamaq qadağandır; bir şərtlə ki, həmin ərazi qanunvericiliklə müəyyən edilmiş heyvan sığınacaqlarının minimum standartlarına cavab verməsin.
Vahid məlumat bazasında heyvan sahibi kimi yalnız 16 yaşına çatmış şəxslər qeydiyyata alına bilər. Bununla yanaşı, potensial olaraq yüksək riskli itlərin sahibi kimi qeydiyyatdan keçmək üçün psixi sağlamlıq barədə arayışın təqdim edilməsi məcburidir.
Ev heyvanlarının saxlanması və onlara qulluq qaydalarının pozulmasına görə bu gündən qüvvəyə minən cərimələrin məbləği aşağıdakı kimidir:
- Baxım, qulluq və saxlanma qaydalarının pozulması – 500 lari
- İctimai nəqliyyatda ev heyvanı ilə birlikdə xalta (tasma) və ya ağızlıqsız hərəkət etmək; pişik və kiçikölçülü itlər vəziyyətində isə – xalta, buruntuq, qucaqda daşıma və ya xüsusi daşıma vasitəsi (konteyner, çanta) olmadan hərəkət etmək – 150 lari
Bundan əlavə, bu gündən etibarən ev heyvanlarının (həddindən artıq sayda) toplanması/yığılması heyvanların müsadirə olunması ilə nəticələnəcək.
Dəniz Nəqliyyatı Agentliyinin məlumatına görə, 2026-cı il 1 iyuldan etibarən göllərdə, çaylarda və su anbarlarında katerlərin, yaxtaların, hidrotsikllərin və digər mühərrikli üzən vasitələrin qeydiyyatdan keçirilməsi və sürücülük sertifikatına sahib olmaq məcburi xarakter daşıyır. Bunun məqsədi daxili sularda naviqasiya təhlükəsizliyi standartlarını və sərnişinlərin təhlükəsizliyini təmin etmək, həmçinin bədbəxt hadisələrin qarşısını almaqdır.
Qeydiyyatsız fəaliyyət göstərmək cəriməyə səbəb olacaq. Belə ki, İnzibati Xətalar Məclisinə əsasən, daxili su hövzələrində naviqasiya qaydalarının pozulması fiziki şəxslərin 500 lari, hüquqi şəxslərin isə 1 000 lari məbləğində cərimələnməsinə səbəb olacaq. Xətanın təkrar törədilməsi halında fiziki şəxs 1 000 lari, hüquqi şəxs isə 2 000 lari məbləğində cərimələnəcək.
Bu yeniliklərdən əlavə, 2026-cı ilin iyul ayından Gürcüstanda aşağıdakı addımların atılması da planlaşdırılır:
2026-cı il 20 iyuldan "TBC Bank"ın kart xidməti şərtləri dəyişir. Bankın rəsmi internet səhifəsində yerləşdirilən məlumata görə, tariflər və filial kanalları vasitəsilə xarici valyutada həyata keçirilən beynəlxalq köçürmələrin komissiya haqqı artır.
Xüsusilə, "TBC"nin debet kartları ilə "TBC" bankomatlarından xarici valyutada nağdlaşdırma komissiyası 0.6% (müvafiq valyutada minimum 0.6 vahid) olaraq təyin edilir.
Bu dəyişiklik aşağıdakılara şamil edilmir:
Şagird kartları, əməkhaqqı layihəsinə daxil olan kartlar, WM kartları, Space kartları, biznes kartları və növbəti paketlərə daxil olan kartlar: TBC Concept 360, TBC Concept, TBC Concept rəqəmsal paketi, TBC Concept premium paketi, TBC Concept 360 paketi və Paket 10.
Hökumət Ətraf Mühitin Mühafizəsi və Kənd Təsərrüfatı Nazirliyinin tərkibində 2 yeni publik hüquqi şəxs (SSİP) təsis edir. Sərəncama əsasən, yeni qurumlardan biri Milli Qastronomiya Agentliyi, digəri isə İnformasiya Texnologiyaları, Ətraf Mühit və Aqro-Xidmətlər Agentliyi adlanacaq.
Sənədə uyğun olaraq, Gürcüstanın Ətraf Mühitin Mühafizəsi və Kənd Təsərrüfatı naziri yeni agentliklərin rəhbərlərinin təyin edilməsini və onların əsasnamələrinin təsdiqlənməsini təmin etməlidir.
Hər iki qərar iyulun 20-dən qüvvəyə minəcək.
Beynəlxalq yeniliklərə gəldikdə isə, 2026-cı il 1 iyuldan etibarən bir neçə yeni tarif qüvvəyə minir:
Türkiyə rəhbərliyi, tariflərin illik yenidən baxılması çərçivəsində, 1 iyuldan etibarən Bosfor və Dardanel boğazlarından gəmilərin keçid rüsumunu 15% artıraraq 6.70 dollara çatdırır.
Ötən ilin iyul ayından bəri Türkiyə boğazlarında tranzit haqqı ton başına 5.83 dollar təşkil edirdi.
Bu rüsum, Bosfor və Dardaneldə naviqasiyanı tənzimləyən 1936-cı il Montrö Konvensiyasına uyğun olaraq, gəmilərin tonajına görə hesablanır.
1 iyuldan etibarən Köln Qotik Kafedral Kilsəsinə giriş ödənişli olur.
Kilsənin dekanı Qvido Osmanın bildirdiyinə görə, standart biletin qiyməti 12 avro təşkil edəcək.
Həmçinin məlum olur ki, məktəblilər, tələbələr və sosial müavinət alan şəxslər üçün müvafiq sənədləri təqdim etdikləri təqdirdə kilsəyə giriş haqqı 6 avro olacaq.
Avropa İttifaqı (Aİ) üzv olmayan ölkələrdən sifariş edilən ucuz bağlamalara əlavə vergi tətbiq edir.
Məlum olduğu kimi, 1 iyuldan etibarən Aİ-yə daxil olmayan ölkələrdən Avropa ölkələrinə göndərilən, dəyəri 150 avro və ya daha az olan satış məhsullarına 3 avroluq gömrük rüsumu tətbiq ediləcək.
