Gürcüstanda yeni sürücülər üçün sınaq müddəti tətbiq ediləcək.

Aktual.ge xəbər verir ki, bu barədə 2026–2030-cu illər üzrə Milli Yol Təhlükəsizliyi Strategiyası və onun Fəaliyyət Planında qeyd olunur.

Xatırladaq ki, sözügedən plan hökumət tərəfindən bir neçə gün əvvəl təsdiqlənib. Hökumətin qiymətləndirməsinə görə, strategiyanın məqsədi yollardakı vəziyyətin yaxşılaşdırılması və beynəlxalq standartların tətbiqidir.

Bununla yanaşı, sənəddə qeyd olunduğu kimi, plan 2030-cu ilədək yol-nəqliyyat hadisələri nəticəsində xəsarət alanların və həlak olanların sayının 25% azaldılmasını nəzərdə tutur.

Hökumət tərəfindən təsdiqlənmiş sənədə əsasən, Gürcüstanda yeni sürücülər üçün xüsusi sınaq müddətinin tətbiqi planlaşdırılır.

Milli Yol Təhlükəsizliyi Strategiyası sənədində qeyd olunduğu kimi, bu sınaq müddətində yeni sürücülərə qarşı daha sərt reaksiya mexanizmləri tətbiq ediləcək. Bu mexanizmlərin onların davranışlarının düzəldilməsinə kömək edəcəyi gözlənilir.

Sənəddə deyilir:

“Gürcüstanda yeni sürücülər yol təhlükəsizliyi baxımından yüksək riskli qrup hesab edildiyindən, onlar üçün xüsusi sınaq müddətinin tətbiqi planlaşdırılır.

Sözügedən müddət ərzində yeni sürücülərin törətdiyi yol hərəkəti qaydalarının pozuntularına görə fərqli və daha sərt hüquqi reaksiya mexanizmlərinin tətbiqi nəzərdə tutulur. Buraya maliyyə sanksiyalarının sərtləşdirilməsi və sürücülük vəsiqəsindəki balların daha çox sayda silinməsi də daxildir.

Belə yanaşma yeni sürücülərin davranışlarının düzəldilməsinə, daha yüksək məsuliyyət standartının formalaşdırılmasına və nəticə etibarilə onların iştirakı ilə baş verən yol-nəqliyyat hadisələrinin qarşısının alınmasına kömək edəcək.

Strategiyanın prioritet istiqamətlərindən biri yeni sürücülərdən qaynaqlanan risklərin azaldılmasıdır. Bu səbəbdən qanunvericilik dəyişiklikləri layihəsi hazırlanmazdan əvvəl Fəaliyyət Planına müvafiq araşdırmanın aparılması ilə bağlı tədbir əlavə ediləcək”.

Sənədə əsasən, Gürcüstanın 2026–2030-cu illər üzrə Milli Yol Təhlükəsizliyi Strategiyasının icrasının aralıq və yekun qiymətləndirilməsi Gürcüstanın İqtisadiyyat və Davamlı İnkişaf Nazirliyinin koordinasiyası ilə həyata keçiriləcək. Nazirlik bunun üçün zəruri məlumatların toplanmasını və təhlilini təmin edəcək.

Aralıq qiymətləndirmə hesabatı 2029-cu ildə (təqvim ilinin iyun ayından gec olmayaraq), yekun hesabat isə 2031-ci ildə (təqvim ilinin iyun ayından gec olmayaraq) hazırlanacaq.

Milli Yol Təhlükəsizliyi Strategiyasının 2026–2027-ci illər üzrə Fəaliyyət Planının həyata keçirilməsi üçün təxmini xərc 98 923 578 lari təşkil edir.