Türkiyə Respublikasının Gürcüstandakı səfiri Mustafa Türker Arının Türkiyə Respublikasının elan edilməsinin 103-cü ildönümü ilə bağlı bəyanatı yayıb.

Aktual.ge xəbər verir ki, diplomatın bəyanatını Türkiyənin Gürcüstandakı Səfirliyi yayıb.

"Bu gün Türkiyə Respublikasının elan edilməsinin 103-cü ildönümünü qeyd edirik. Böyük liderimiz Mustafa Kamal Atatürkün ətrafında birləşən türk xalqı Birinci Dünya müharibəsinin başa çatmasından dərhal sonra milli azadlıq mübarizəsinə başladı. Bu mübarizə tariximizdə 'Milli Mücadilə' (Milli mübarizə) adı ilə tanınır.

Sevimli ölkəmizin hər bir guşəsini əhatə edən milli həmrəylik prosesi böyük fədakarlıq və cəsarət bahasına qazanılan qələbələrlə birlikdə Türkiyə Respublikasının təməllərini qoydu. Beləliklə, 1923-cü il oktyabrın 29-da Qazi Mustafa Kamal Atatürk və onun ətrafında birləşən milli azadlıq mübarizəsinin liderləri Türkiyə Respublikasını elan etdilər.

Bu gün zati-aliləri, Prezident Rəcəb Tayyib Ərdoğanın qətiyyətli rəhbərliyi altında Türkiyə həm öz regionunda, həm də onun hüdudlarından kənarda fəal diplomatiya həyata keçirir. Xarici siyasətimiz prinsipial və sülhsevərdir. O, böyük Atatürkün 'Yurdda sülh, cahanda sülh' şüarına əsaslanır. Qlobal siyasətin müasir mərhələsinin təkcə geosiyasi böhranların çoxluğu ilə deyil, həm də dərin struktur dəyişiklikləri ilə səciyyələndiyi bir şəraitdə bütün dünyada sülh xarici siyasətimizin və diplomatik səylərimizin təməl daşıdır.

Xarici işlər nazirimiz cənab Hakan Fidanın da vurğuladığı kimi, Türkiyə diplomatik xəttini qorumaq, gərginliyi azaltmaq və ləyaqətli dialoq kanalları açmaq imkanına malik dövlətlərdən biridir.

Qeyd etmək lazımdır ki, Türkiyənin regional sülh prosesində iştirakına hər zaman ehtiyac duyulur. Çünki biz coğrafi mövqeyimiz, institusional imkanlarımız, 'Qlobal Cənub'la, eləcə də ənənəvi Qərb məkanından kənarda fəaliyyət göstərən aktorlarla, o cümlədən Afrika və Latın Amerikası ölkələri ilə tarixi və mühüm əlaqələrimiz kimi müxtəlif strateji potensialları özündə birləşdiririk. Dünyanın üçüncü ən böyük diplomatik şəbəkəsinə sahibik.

Türkiyə ilə Gürcüstan arasında qarşılıqlı əlaqələrin və münasibətlərin əsrlərə söykəndiyini nəzərə alsaq, bu gün biz ailə və ailə dəyərlərini dəstəkləyən, bir-birinə təkcə mehriban qonşuluq münasibətləri ilə deyil, həm də son dərəcə sıx mədəni və humanitar əlaqələrlə bağlı olan iki strateji tərəfdaş ölkəyik.

İki ölkə arasında 1918-ci il iyunun 4-də imzalanmış 'Sülh və dostluq müqaviləsini', eləcə də Gürcüstanın ilk səfiri Simon Mdivaninin 1921-ci il fevralın 8-də Qazi Mustafa Kamal Atatürkə etimadnaməsini təqdim etməsini xatırlatmaq istərdim.

Qeyd etmək lazımdır ki, ölkələrimiz arasında diplomatik münasibətlərin bərpasından ötən 35 il ərzində ikitərəfli əməkdaşlıq bütün sahələrdə əhəmiyyətli irəliləyiş əldə edib. Bu gün regionda sülh və sabitliyi qorumaq, dostluğumuz çərçivəsində əldə olunan nailiyyətləri daha da möhkəmləndirmək üçün əməkdaşlığın yeni istiqamətlərini müəyyənləşdirmək məqsədilə bütün səylərimizi səfərbər edirik. Böyük Şota Rustaveli 'Pələng dərisi geymiş pəhləvan' əsərində qeyd etdiyi kimi: 'Yaxınını sevmək hər şeydən möhkəmdir'.

Təhsildən hərbi sahəyə, mədəniyyətdən turizm sektoruna qədər geniş spektri əhatə edən əməkdaşlığımız mövcuddur. Bütün maraqlı tərəfdaşları bu sahələrdə mövcud olan sıx əlaqələri daha da möhkəmləndirməyə və bu məqsədlə TİKA-nın layihələrindən, 'Beynəlxalq Maarif Məktəbləri'nin proqramlarından, Türkiyə təqaüdlərindən, Yunus Emre adına Türk Mədəniyyət Mərkəzinin proqramlarından, 'Türk Hava Yolları'nın və digər şirkətlərin uçuşlarından yararlanmağa dəvət edirik.

Gürcüstanda fəaliyyət göstərən Türkiyə bankları - 'Ziraat Bank' və 'İşbank' artıq onilliklərdir ki, maliyyə əməkdaşlığının inkişafına töhfə verirlər. Münasibətlərimizi nəzərə alsaq, müdafiə sənayesi sahəsində əməkdaşlıq böyük potensiala malikdir və bu istiqamətdə yeni addımlar atılacağını gözləyirik.

Türkiyə son 18 il ərzində Gürcüstanın bir nömrəli ticarət tərəfdaşı olmaqdan qürur duyur. İkitərəfli ticarətin həcmi 3,1 milyard ABŞ dolları təşkil edir. 2026-cı ilin ilk səkkiz ayında ticarət dövriyyəsi 2,3 milyard ABŞ dollarına çatıb. İllik ticarət dövriyyəsini 5 milyard ABŞ dollarına çatdırmaq üçün fəal iş aparırıq. Bu məqsədə nail olunmasına azad ticarət haqqında saziş də əlavə təkan verir.

Gürcüstanda yaradılmış əlverişli iqtisadi mühit sayəsində ölkədə infrastruktur, qonaqpərvərlik, mülki aviasiya, bərpaolunan enerji və istehsal sektorları kimi sahələrdə təxminən 3 min Türkiyə şirkəti fəaliyyət göstərir. Türkiyənin Gürcüstana yatırdığı investisiyaların ümumi həcmi 2,5 milyard ABŞ dollarına çatıb.

Ümumi dəyəri 5,6 milyard ABŞ dolları olan layihələrlə yanaşı, Türkiyənin tikinti şirkətləri Gürcüstanın infrastruktur inkişafı layihələrinə də böyük maraq göstərirlər.

Türkiyənin Gürcüstanın ərazi bütövlüyünə və suverenliyinə verdiyi qətiyyətli dəstəyi xüsusi vurğulamaq istərdim. Biz Gürcüstanın təhlükəsizliyinin, sabitliyinin və rifahının yalnız ikitərəfli münasibətlərimiz üçün deyil, bütövlükdə regionumuz üçün də son dərəcə mühüm olduğunu anlayırıq. Türkiyə ikitərəfli münasibətləri bütün mümkün istiqamətlərdə daha da inkişaf etdirmək üçün qəti siyasi iradəyə malikdir.

Bu əlamətdar gündən istifadə edərək Gürcüstanın dost xalqını səmimi-qəlbdən salamlayır, bayramımızı və sevincimizi bizimlə bölüşdüklərinə görə onlara təşəkkürümü bildirirəm"  - Mustafa Türker Arının bəyanatında deyilir.