Kateqoriyalar
Axaltsixe məscidinin imamı Şevket Dvalidze iki həftə əvvəl – iyulun 18-də atasının Axaltsixedə yerləşən evinin həyətində döyülüb.
Zərərçəkənlərin sözlərinə görə, 56 yaşlı imama 10-dan çox şəxs hücum edib. Lakin polis onlardan yalnız ikisini saxlayıb. Daha sonra məhkəmə hər iki saxlanılan şəxsi girov müqabilində azadlığa buraxıb.
Aktual.ge xəbər verir ki, Şevket Dvalidze isə iddia edir ki, polis onu şikayətini geri götürməyə sövq edib.
Atasının evinin həyətində hücuma məruz qalan Axaltsixe məscidinin imamı Şevket Dvalidze müsəlman məshətlidir. O və ailəsinin bir hissəsi 2001-ci ildə Gürcüstana qayıdıb.
Ailə əvvəlcə Marneulidə yaşayıb, 2009-cu ildə isə Axaltsixeyə köçərək kirayədə məskunlaşıb. Şevket Dvalidze 2010-cu ildə Vale şəhərində mənzil alıb və son 16 ildə burada yaşayır.
O, son 10 ildir Axaltsixe məscidinin imamıdır və bölgədə Şevket hoca kimi tanınır.
İyulun 18-də baş verən hadisə ilə bağlı "Batumelebi" nəşrinə imamın oğlu Ömər Dvalidze danışıb.
Onun sözlərinə görə, hadisədən bir həftə əvvəl Türkiyədən atasının qardaşı və əmisi oğlu qonaq gəlib. Əmisi Türkiyəyə qayıtmazdan əvvəl ailə birlikdə Axaltsixedə yaşayan babasının evinə gedib.
Axşam saatlarında Ömər Dvalidze və əmisi oğlu gəzintidən qayıdarkən yolda pivə içən iki qrup gənclə rastlaşıblar. Gənclər onları yanlarına çağıraraq söhbətə başlayıblar.
Bu zaman daha yaşlı şəxslərin olduğu qrupdan sərxoş vəziyyətdə olan bir nəfər onlara pivə təklif edib. Ömər Dvalidze müsəlman olduğunu və spirtli içki qəbul etmədiyini bildirib. Söhbət gürcü dilində davam edib.
Daha sonra əmisi oğlu danışılanları soruşduqda, Ömər ona söhbəti türk dilində tərcümə edib. Bu isə sərxoş şəxsin narazılığına səbəb olub.
Onun sözlərinə görə, həmin şəxs dəfələrlə "Gürcüstandasan, niyə gürcücə danışmırsan? Niyə türk dilində danışırsan?" deyə irad bildirib.
Ömər Dvalidze isə cavabında əmisi oğlunun Gürcüstana qonaq gəldiyini və gürcü dilini bilmədiyi üçün söhbəti ona türk dilində tərcümə etdiyini izah edib.
Bundan sonra onlardan kim olduqları və Axaltsixeyə hansı məqsədlə gəldikləri soruşulub.
Ömər Dvalidzenin sözlərinə görə, o, qarşı tərəfə babasının evinə qonaq gəldiklərini bildirib və evi göstərərək babasının orada yaşadığını deyib.
Daha sonra ondan əmisinin adını soruşublar. Adı eşidən şəxslərdən biri buna istehza edərək əmisini təhqir edib. Ardınca 16 yaşlı əmisi oğluna əl qaldırıb.
"Əmim oğlu evə tərəf qaçdı, mən də onun arxasınca getdim. Onlar da bizi təqib etdilər. Babamın evinin həyətinə qaçdıq, amma təxminən 10-12 nəfər arxamızca həyətə daxil oldu.
Səs-küyə ailə üzvlərim çölə çıxdılar. Atam nə baş verdiyini soruşan kimi onun üzünə zərbə endirdilər. Atamı yerə yıxdılar və 7-8 nəfər onu təpikləməyə başladı.
Anam və evdə olan digər qadınlar həyətə qaçdılar. Qonşu qadınlar da köməyə gəldi. Nəticədə qadınlar hücum edənləri həyətdən çıxara bildilər və polisə məlumat verdilər", – deyə Ömər Dvalidze "Batumelebi" nəşrinə bildirib.
Onun sözlərinə görə, hadisə yerinə gələn polis hücum edənlərdən yalnız iki nəfəri saxlayıb.
"Digər əmim oğlu həmin ərazidə yaşayır və bizə hücum edənlərin hamısını tanıyır. Onların kim olduqlarını polisə bildirdik. Buna baxmayaraq, ikidən artıq şəxs saxlanılmadı", – deyə o əlavə edib.
"Batumelebi" hadisə ilə bağlı Daxili İşlər Nazirliyinə müraciət edərək araşdırmanın hansı maddə ilə başladıldığını soruşub.
Nazirlikdən bildirilib ki, polis hadisədən dərhal sonra iki nəfəri saxlayıb. Faktla bağlı istintaq Gürcüstan Cinayət Məcəlləsinin zorakılığı nəzərdə tutan 126-cı maddəsi ilə aparılır.
Atasının evinin həyətində 10-dan çox şəxsin hücumuna məruz qalan Şevket Dvalidze isə "Batumelebi"yə açıqlamasında özünü təhlükəsiz hiss etmədiyini deyib.
"16 ildən çoxdur Valedə yaşayıram. Orada çox yaxşı insanlar yaşayır. Bu vaxta qədər heç vaxt Axaltsixedə başıma gələn kimi bir hadisə ilə üzləşməmişdim", – deyə Şevket Dvalidze bildirib.
O əlavə edib ki, indiyədək iyulun 18-də baş verən hadisənin təsadüf, yoxsa əvvəlcədən planlaşdırılmış hücum olduğunu müəyyənləşdirə bilməyib.
Şevket Dvalidze bildirir ki, onu məcbur ediblər və polis bölməsindən şikayətini geri götürməyə vadar ediblər.
“Şikayətimi geri götürdüm. Axaltsixe polisi çox fəal işləyib! Onlara təşəkkür edirəm. Onlar dolayı yollarla məni şikayəti geri götürməyə sövq etdilər. Mən onlara minnətdaram... Belə deyək, “örtülü şəkildə”. Kim başa düşəcəksə, başa düşəcək”, – deyə Şevket Dvalidze bildirib.
Axaltsixedə Şevket hoca kimi tanınan Şevket Dvalidze iyulun 18-də baş verən hadisə ilə bağlı geniş Facebook canlı yayımı edib. O, yayım zamanı Axaltsixedə baş verənləri ətraflı danışıb və Gürcüstanda yaşayan müsəlman məshətlilərin qarşılaşdığı problemlərdən də söz açıb.
“Bilsinlər ki, onların (hücum edənlərin) vurduğu 100-150 təpik bizi sındıra bilmədi. Allaha şükür, ayaq üstəyik və yenə də möhkəm dayanacağıq.
Axaltsixe sakinlərinə, bizə dəstək olmaq üçün gələn insanlara təşəkkür edirəm. Onlar dedilər ki, bu azsaylı xalqın müdafiəsi üçün aidiyyəti qurumlara müraciət etməliyik. Bu, həm də Gürcüstanın maraqlarına uyğundur. Hansı ölkə etnik qarşıdurma istəyər? Heç biri. Onlar bunu məndən də yaxşı bilirlər.
Gürcüstan çox qədim tarixə malik ölkədir. Mən təxminən 5 min illik yaşı olduğu deyilən gürcü əlifbası ilə fəxr edirəm. Gürcü dili qədim və qorunub saxlanılan bir dildir. Sovet dövründə belə nə dilini, nə əlifbasını, nə də soyadlarını itirmədilər. Başqaları soyadlarını dəyişdirdi, amma gürcülər bunu etmədi. Bu xalq öz mədəniyyətinə, dininə və mənşəyinə sahib çıxır.
Amma öz mənşəyini sevmək başqalarını kənarlaşdırmaq demək deyil. Bunu yadda saxlamaq lazımdır. Gürcüstan çoxmillətli ölkədir və biz də onun bir hissəsiyik. Sayımız azdır, amma biz də varıq.
Bizi “ahıska türkləri” kimi tanıyırlar və bizi belə qəbul ediblər. Biz burada yaşayırıq. Əgər insan ölkədə 10, 20, 30 il yaşayırsa və ona vətəndaşlıq verilmirsə, bu, problem deyilmi?
Əgər insan burada yaşamağa qərar veribsə, dövlət ona dəstək olmalı, vətəndaşlıq və ya yaşayış icazəsi verməlidir. Gürcüstan isti və qonaqpərvər ölkədir. Öz sakinlərinə belə münasibət göstərməlidir. Biz bundan artıq heç nə istəmirik.
Bilirsiniz ki, Axaltsixe türkləri zəhmətkeş insanlardır. Harada olsalar, “daşdan su çıxararlar”. Heç kimi narahat etmirik, hər şeyi öz zəhmətimizlə qazanırıq. Ev tikirik, maşın alırıq, öz həyatımızı yaşayırıq.
Amma bəzi insanları bu narahat edir. Bəziləri bütün günü heç nə etmədən gəzir. Sən isə qul kimi işləyirsən, tikirsən, nəyəsə nail olursan... Sonra deyirlər: “Biz illərdir buradayıq, bunlara baxın, necə evləri və maşınları var”.
İnsan, sən də çalış, sənin də olar! Bu zəhmətkeş insanlardan nə istəyirsiniz? Onlar sizin qapınıza gəlmir, heç nə oğurlamır, heç nə tələb etmir. Əksinə, hər il Qurban bayramında qonşulara – həm gürcülərə, həm də ermənilərə ət paylayırıq. Kəndimizdə soruşsanız, hamı təsdiq edər ki, biz yaxşı qonşularıq.
Biz gürcü dilini öyrənməyə çalışırıq. Bazara gedəndə gürcücə danışmaq, qonşularla gürcü dilində ünsiyyət qurmaq istəyirik. Çalışırıq, amma yaş da önəmlidir. 60-70 yaşlı insan dili necə asanlıqla öyrənə bilər?
Gürcü dili çox çətin və zəngin dildir. Mən çox çalışmışam, dərslərə də getmişəm, amma yenə də gürcü kimi sərbəst danışa bilmirəm. Bu yaşda dili öyrənmək daha çətindir. Heç kimi buna məcbur etmək olmaz. İnsan bacardığı qədər öyrənir”, – deyə Şevket Dvalidze Facebook canlı yayımında bildirib.
"Batumelebi" nəşri Gürcüstanın Xalq Müdafiəçisinə (Ombudsman) müraciət edərək iyulun 18-də baş verən hadisə ilə bağlı araşdırmanın başlayıb-başlamadığını soruşub.
Xalq Müdafiəçisi Aparatından bildirilib ki, məsələ araşdırılacaq və Daxili İşlər Nazirliyindən istintaq materialları tələb olunacaq.
"Batumelebi" hadisədə iştirak edən digər şəxslərlə əlaqə saxlamağa çalışsa da, buna nail olmayıb. Həmçinin Daxili İşlər Nazirliyi tərəfindən saxlanılan iki şəxslə və onların vəkilləri ilə əlaqə yaratmaq mümkün olmayıb.
İyulun 21-də Türkiyə parlamentində AK Parti deputatı Kaan Koç çıxış edərək Gürcüstanda baş verən hadisəni pisləyib.
Deputat çıxışı zamanı Gürcüstan hüquq-mühafizə orqanlarına təşəkkür edib, eyni zamanda vurğulayıb ki, "ahıska türkləri sahibsiz deyil".
"Bu gün nə 1877-1878-ci illər müharibəsinin, nə də 1944-cü il deportasiyasının şəraiti mövcuddur. Hər kəs bu şüurla hərəkət etməli və ahıska türklərinə qarşı yönəlmiş təxribatlara heç vaxt yol verməməlidir.
Bizim üçün Axaltsixedə sülhün, qardaşlığın və birgəyaşayış mədəniyyətinin qorunması olduqca vacibdir. İnanırıq ki, dost və qonşu Gürcüstan bundan sonra da bu həssaslıqla hərəkət edəcək.
Hər kəs bilməlidir ki, ahıska türkləri vətənsiz və sahibsiz deyillər. Onların yanında hər zaman Türkiyə Respublikası dövləti və cənab prezident Rəcəb Tayyib Ərdoğan dayanır", – deyə Kaan Koç bildirib.
Məlumat üçün bildirək ki, Kaan Koç Türkiyə Prezidenti Rəcəb Tayyib Ərdoğanın rəhbərlik etdiyi "AK Parti"nin partiyanın kvotası ilə Ərdahan bölgəsindən Türkiyə parlamentinə seçilib.
Mənbə: Batumelebi
